കൽപറ്റ: വയോജന പെൻഷൻ 5000 രൂപയായി ഉയർത്തണമെന്നും, കേന്ദ്ര വിഹിതം 200 രൂപയിൽ നിന്നും 2500 രൂപയായി ഉയർത്തണമെന്നും ആവശ്യപ്പെട്ടു സീനിയർ സിറ്റിസൺസ് സർവീസ് കൗൺസിൽ വയനാട് ജില്ലാ കമ്മിറ്റി കലക്ടറേറ്റിലേക്ക് മാർച്ചും ധർണയും നടത്തി. വിലക്കയറ്റം കൊണ്ട് കഷ്ടപ്പെടുന്ന വയോജനങ്ങളുടെ വരുമാന പരിധി നോക്കാതെ പെൻഷൻ അനുവദിക്കുക, കേന്ദ്രസർക്കാർ പിൻവലിച്ച റെയിൽവേ ടിക്കറ്റ് നിരക്ക് സൗജന്യം പുനസ്ഥാപിക്കുക, ആശുപത്രി ഒ.പി.കളിൽ വയോജനങ്ങൾക്ക് മുൻഗണന നൽകുക, വയോജന വകുപ്പ് രൂപീകരിക്കുക, വയോജന കമ്മിഷന്റെ പ്രവർത്തനങ്ങൾ ദുരിതപ്പെടുത്തുക തദ്ദേശ സ്വയംഭരണ സ്ഥാപനങ്ങളിൽ ബജറ്റിന്റെ 10% വയോജന ക്ഷേമത്തിനായി വകയിരുത്തുക, ജോലിയിൽ നിന്ന് വിരമിക്കുന്ന തോട്ടം തൊഴിലാളികളെ പുന:രധിവസിപ്പിക്കുക തുടങ്ങിയ ആവശ്യങ്ങളും ഉന്നയിച്ചു. ജില്ലാ പ്രസിഡൻ്റ് കെ.എം ബാബു അധ്യക്ഷത വഹിച്ചു. സംസ്ഥാന സെക്രട്ടറി എം എഫ് ഫ്രാൻസിസ് ധർണ ഉദ്ഘാടനം ചെയ്തു . ജില്ലാ സെക്രട്ടറി വി.വി ആൻ്റണി , എ ബാലചന്ദ്രൻ, വി യൂസഫ്, കെ വിജയകുമാരി,കെ എ പ്രേംജിത്ത് , മാത്യു കോട്ടൂർ, എ.കൃഷ്ണകുമാർ എന്നിവർ സംസാരിച്ചു. ഇ. എ. വിജയരാഘവൻ, കെ.എം. അബ്രാഹം, എം ഹബീബ് റഹ്മാൻ റാവുത്തർ , കെ ദാമോദരക്കുറുപ്പ്,ഡി ദേവരാജൻ , ആർ ശങ്കുണ്ണി എന്നിവർ മാർച്ചിന് നേതൃത്വം കൊടുത്തു.