2026 ഒക്ടോബർ 14 ബുധൻ
ന്യൂഡല്‍ഹി: മുഖ്യതെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിന്റെ രാജി ആവശ്യപ്പെട്ട് തിരംഗ മാര്‍ച്ച് പ്രഖ്യാപിച്ച് സിജെപി. വെള്ളിയാഴ്ച വൈകിട്ട് അഞ്ച് മണിക്ക് കൊണാട്ട് പ്ലേസില്‍ നിന്നാരംഭിക്കുന്ന മാര്‍ച്ചിന് ദേശീയ പതാകയുമായി എല്ലാവരും എത്തിച്ചേരണമെന്ന് സിജെപി സ്ഥാപകന്‍ അഭിജീത് ദീപ്‌കെ പറഞ്ഞു. എക്‌സ് വീഡിയോയിലൂടെയാണ് ആഹ്വാനം. മുഖ്യതെരഞ്ഞെടുപ്പ് കമ്മീഷണറുടെ രാജിയാവശ്യപ്പെട്ട് ജന്തർ മന്തറിലെ ബാരിക്കേഡുകൾ ചാടിക്കടന്ന് പതാക ഉയർത്താൻ ശ്രമിച്ചതിനെ തുടർന്ന് ചൊവ്വാഴ്ച രാവിലെയാണ് സിജെപി നേതാക്കൾ കസ്റ്റഡിയിലായത്. സമരങ്ങൾക്കായി നിശ്ചയിച്ചിരുന്ന ജന്തർ മന്തർ പ്രദേശം അടുത്തിടെ ഔദ്യോഗിക പ്രതിഷേധ കേന്ദ്രങ്ങളുടെ പട്ടികയിൽ നിന്ന് ഒഴിവാക്കിയിരുന്നു. ഇതിന് പിന്നാലെയാണ് സിജെപി നേതാക്കൾ ജന്തർ മന്തറിലെത്തുന്നതും പൊലീസ് കസ്റ്റഡിയിലെടുക്കുന്നതും.
അതേസമയം, സിജെപി നേതാക്കളെ ജയിലിലാക്കിയതിനെതിരെ ലോക്സഭാ പ്രതിപക്ഷ നേതാവ് രാഹുൽ ഗാന്ധി രംഗത്തെത്തിയിരുന്നു. സമാധാനപരമായി ദേശീയപതാക വീശുന്നത് കുറ്റമല്ലെന്നും യുവാക്കളെ തടവിലാക്കുന്നത് ഭീരുത്വമാണെന്നും രാഹുൽ ഗാന്ധി വ്യക്തമാക്കി. ജന്തർ മന്തറിൽ സമരം ചെയ്ത സിജെപി നേതാക്കളായ സൗരവ് ദാസ്, അശുതോഷ് റങ്ക എന്നിവരെ അഞ്ച് ദിവസത്തെ ജുഡിഷ്യൽ കസ്റ്റഡിയിലാണ് വിട്ടത്. സൗരവിനെയും അശുവിനെയും വെറും ദേശീയപതാകയായ ത്രിവര്‍ണ്ണ പതാക ഉയര്‍ത്തിയതിന്റെ പേരില്‍ മാത്രമാണ് ജയിലില്‍ അടച്ചിരിക്കുന്നത്. അതിനാല്‍ എല്ലാ രാജ്യസ്‌നേഹികളോടും, രാജ്യത്തിന്റെ ത്രിവര്‍ണ്ണ പതാകയെ സ്‌നേഹിക്കുന്ന എല്ലാ ജനങ്ങളോടും ഞാന്‍ അഭ്യര്‍ത്ഥിക്കുകയാണ്; ഒക്ടോബര്‍ 16-ന് വൈകുന്നേരം 5 മണിക്ക് നിങ്ങളെല്ലാവരും ഡല്‍ഹി കൊണാട്ട് പ്ലേസിലെ (CP) സെന്‍ട്രല്‍ പാര്‍ക്കില്‍ ദേശീയപതാകയുമായി എത്തിച്ചേരണം.
അവിടെ നാം നമ്മുടെ ദേശീയപതാക ഉയര്‍ത്തുകയും, ദേശീയപതാക ഉയര്‍ത്തുന്നത് കുറ്റമല്ലെന്ന് അധികാരികള്‍ക്ക് കാണിച്ചുകൊടുക്കുകയും ചെയ്യും. ഡല്‍ഹിയിലേക്ക് വരാന്‍ കഴിയാത്തവര്‍, അവരവരുടെ നഗരങ്ങളില്‍ വൈകുന്നേരം ത്രിവര്‍ണ്ണ പതാകയേന്തി മാര്‍ച്ച് നടത്തുക. നമ്മുടെ ദേശീയപതാക നമ്മുടെ അഭിമാനമാണെന്നും, അത് ഉയര്‍ത്തുന്നത് യാതൊരു കുറ്റവുമല്ലെന്നും ഈ ഏകാധിപതികളോട് നമുക്ക് വിളിച്ചുപറയാം. ഇതിന്റെ പേരില്‍ ഒരുപക്ഷേ എന്നെയും ജയിലില്‍ അടച്ചേക്കാം, എന്നാല്‍, അതുകൊണ്ടൊന്നും നമ്മെ ഭയപ്പെടുത്താനാകില്ല. എന്റെ ദേശീയപതാക എന്റെ അഭിമാനമാണ്, അതിനെ ഉയര്‍ത്തിക്കൊണ്ട് ഇനിയും മുന്നോട്ട് പോവുകതന്നെ ചെയ്യും.