2026 നവംബർ 4 ബുധൻ
വാഷിങ്ടൺ: യു.എസ്. ഇടക്കാല തിരഞ്ഞെടുപ്പിൽ റിപ്പബ്ലിക്കൻ പാർട്ടിക്ക് കനത്ത തിരിച്ചടിനൽകി ടെക്സസിലും കാൻസസിലും ഡെമോക്രാറ്റുകളുടെ ചരിത്രവിജയം. പതിറ്റാണ്ടുകളായി റിപ്പബ്ലിക്കൻ പാർട്ടിയുടെ ശക്തികേന്ദ്രങ്ങളായിരുന്ന ഇരുസംസ്ഥാനങ്ങളിലും സെനറ്റ് സീറ്റുകൾ പിടിച്ചെടുത്താണ് ഡെമോക്രാറ്റുകൾ രാഷ്ട്രീയ ചരിത്രം തിരുത്തിയത്. ടെക്സസിൽ 1988-നുശേഷം ആദ്യമായി ഒരു ഡെമോക്രാറ്റ് സെനറ്റർ ജയിച്ചപ്പോൾ, കാൻസസിൽ 1932-നുശേഷം ആദ്യമായാണ് ഡെമോക്രാറ്റുകൾ സെനറ്റ് സീറ്റ് സ്വന്തമാക്കുന്നത്. യു.എസ്. കോൺഗ്രസിന്റെ നിയന്ത്രണം പൂർണമായി ഡെമോക്രാറ്റുകളുടെ കൈകളിലെത്തുംവിധമാണ് യു.എസിലെ ഇടക്കാല തിരഞ്ഞെടുപ്പ് ഫലസൂചനകൾ. ടെക്സസിൽ റിപ്പബ്ലിക്കൻ സ്ഥാനാർഥിയും മുൻ അറ്റോർണി ജനറലുമായ കെൻ പാക്സ്റ്റണെ പരാജയപ്പെടുത്തിയാണ് ഡെമോക്രാറ്റ് സ്ഥാനാർഥി ജെയിംസ് തലാരിക്കോ ജയിച്ചത്. മുൻ അധ്യാപകനായ തലാരിക്കോ കഴിഞ്ഞവർഷംവരെ ദേശീയ രാഷ്ട്രീയത്തിൽ വലിയ ശ്രദ്ധ നേടിയിരുന്ന വ്യക്തിയായിരുന്നില്ല.
എന്നാൽ റിപ്പബ്ലിക്കൻ ഭരണത്തിനുകീഴിൽ ജീവിതച്ചെലവ് വർധിക്കുന്നതും സാധാരണക്കാർ നേരിടുന്ന സാമ്പത്തിക പ്രതിസന്ധികളും പ്രചാരണത്തിലെ പ്രധാന വിഷയങ്ങളാക്കി അദ്ദേഹം ജനപിന്തുണ നേടിയെടുത്തു. കാൻസസിലും ഡെമോക്രാറ്റുകൾ ചരിത്രനേട്ടമാണ് സ്വന്തമാക്കിയത്. റിപ്പബ്ലിക്കൻ സ്ഥാനാർഥിയും നിലവിലെ സെനറ്ററുമായ റോജർ മാർഷലിനെ പരാജയപ്പെടുത്തി ഡെമോക്രാറ്റ് സ്ഥാനാർഥി ആദം ഹാമിൽട്ടണാണ് വിജയിച്ചത്. 1932-നുശേഷം ആദ്യമായാണ് കാൻസസിൽ ഒരു ഡെമോക്രാറ്റ് യു.എസ്. സെനറ്റ് സീറ്റ് നേടുന്നത്. ഏകദേശം ഒരു നൂറ്റാണ്ടായി സംസ്ഥാനത്ത് ഡെമോക്രാറ്റുകൾക്ക് ലഭിക്കാതിരുന്ന സെനറ്റ് പ്രാതിനിധ്യം തിരിച്ചുപിടിക്കാനും ഇതിലൂടെ പാർട്ടിക്ക് സാധിച്ചു. ടെക്സസിലും കാൻസസിലും ഒരേസമയം നേടിയ ഈ ചരിത്രവിജയങ്ങൾ റിപ്പബ്ലിക്കൻ പാർട്ടിക്കും ട്രംപ് ഭരണകൂടത്തിനും വലിയ രാഷ്ട്രീയ മുന്നറിയിപ്പാണ് നൽകുന്നത്.
ജീവിതച്ചെലവ്, കുടിയേറ്റം, വിദേശനയം തുടങ്ങിയ വിഷയങ്ങളിലെ ജനങ്ങളുടെ അതൃപ്തി തിരഞ്ഞെടുപ്പിൽ പ്രതിഫലിച്ചെന്നാണ് വിലയിരുത്തൽ. കോൺഗ്രസിന്റെ ഇരുസഭകളിലെയും നിയന്ത്രണം ഡെമോക്രാറ്റുകൾക്ക് ലഭിക്കാനുള്ള സാധ്യത ശക്തിപ്പെടുത്തുന്നതാണ് ഈ മുന്നേറ്റം.