2026 നവംബർ 5 വ്യാഴം
തിരുവനന്തപുരം: പരീക്ഷാത്തട്ടിപ്പിൽ പിഎസ് സി ചെയർമാനെ പ്രതിചേർക്കാൻ സാധ്യത. അംഗങ്ങളിൽ ചിലരും സെക്രട്ടറിയും നൽകിയ മൊഴികളുടെ അടിസ്ഥാനത്തിൽ നിയമോപദേശത്തിന് ശേഷമാകും ക്രൈം ബ്രാഞ്ചിൻറെ അന്തിമ തീരുമാനം. ആസൂത്രണ ബോർഡ് പരീക്ഷാ തട്ടിപ്പിൽ ഡെപ്യൂട്ടി സെക്രട്ടറിയായിരുന്ന സതീഷിനെ പഴിച്ചാണ് അഡീഷനൽ സെക്രട്ടറി ആർ ഹരി മൊഴി നൽകിയത്.
പുറത്താക്കണമെന്ന മുൻ ഗവർണ്ണറുടെ ശുപാർശ ഒരുവശത്ത്. ശുദ്ധീകരണം ഉറപ്പെന്ന മുഖ്യമന്ത്രിയുടെ മുന്നറിയിപ്പ് മറുവശത്ത്. അതിനിടെയാണ് ചെയർമാൻ പ്രതിപ്പട്ടികയിലേക്ക് എത്താനുള്ള സാധ്യത കൂടുന്നത്. ചെയർമാനെ കുരുക്കുന്ന രീതിയിലാണ് ചില അംഗങ്ങളും പിഎസ് സി സെക്രട്ടറിയും നൽകിയ മൊഴികൾ. ചോദ്യപേപ്പർ തയ്യാറാക്കുന്നവരുടെ പാനൽ നിശ്ചയിക്കുന്നത് ചെയർമാനാണ്. എഴുത്തുപരീക്ഷാ മൂല്യനിർണ്ണയം നടത്തുന്നവരെ തീരുമാനിക്കുന്നതും ചെയർമാൻ നേരിട്ട് തന്നെ എന്നൊക്കെയാണ് മൊഴികൾ.
നിർണ്ണായകമായ പല തീരുമാനങ്ങളും കൂട്ടായ ആലോചനയില്ലാതെ സെക്രട്ടറിയെ അറിയിക്കാതെ സ്വന്തം നിലക്ക് എംആർ ബൈജു എടുക്കുന്നുവെന്നാണ് മൊഴികൾ. ചെയർമാനും അറസ്റ്റിലുള്ള ആർ ഹരിയും തമ്മിലുള്ള ബന്ധം ഇതിനകം വ്യക്തമാണ് രണ്ടുപേരെയും ഒരുമിച്ച് ചോദ്യം ചെയ്യാനായിരുന്നു ഇന്നലെ ക്രൈം ബ്രാഞ്ച് നീക്കം. പക്ഷെ ചെയർമാൻ സഹകരിച്ചില്ല. ഹൈക്കോടതിയുടെ അന്തിമവിധി വരട്ടെയെന്നും ഇന്നലെ ഔദ്യോഗിക തിരക്കുകളുണ്ടെന്നുമായിരുന്നു വാദം. വീണ്ടും ചോദ്യം ചെയ്യലിന് ഹാജരാകാൻ ചെയർമാന് നോട്ടീസ് നൽകും. ചെയർമാനെയും ഹരിയെയും ഒന്നിച്ചിരുത്തി ചോദ്യം ചെയ്യാനാണ് ശ്രമം.
അതിന് ശേഷം നിയമോപദേശം തേടിയാകും പ്രതിയാക്കുന്നതിൽ അന്തിമതീരുമാനം. സതീഷ് കീഴ് ഉദ്യോഗസ്ഥരെ പഴിച്ചപ്പോൾ ഹരി സതീഷിനെ കുറ്റപ്പെടുത്തിയാണ് മൊഴി നൽകിയത്. കമ്പ്യൂട്ടർ വിദഗ്ധനായ സതീഷ് പറഞ്ഞത് തനിക്ക് കമ്യൂപ്പർ പരിജ്ഞാനം ഇല്ലെന്ന വാദം. പത്ത് ചോദ്യങ്ങൾ മൂല്യനിർണ്ണയം നടത്താതിരുന്നത് സാങ്കേതിക പിഴവാണെന്ന സതീഷിൻറെ വാദം ക്രൈം ബ്രാഞ്ച് തള്ളുകയാണ്. ഒഴിവാക്കൽ ബോധപൂർവ്വമാണെന്നാണ് വിലയിരുത്തൽ. പിഎസ് സി ആസ്ഥാനത്തെത്തി സാങ്കേതിക വിദഗ്ധരുടെ സഹായത്തോടെ നടത്തിയ തെളിവെടുപ്പിലാണ് ഈ കണ്ടെത്തൽ.