വയനാട് ഡെയ്ലി | എള്ളുമന്ദം: എള്ളുമന്ദം ഒരപ്പിനു സമീപം കൂറ്റൻ മരം റോഡിലേക്ക് കടപുഴകി വീണ് ഗതാഗതം പൂർണ്ണമായും തടസ്സപ്പെട്ടു. കെ.എസ്.ഇ.ബി ലൈനുകൾക്ക് മുകളിലേക്കാണ് മരം വീണത്. ഇതിനെത്തുടർന്ന് ലൈനുകൾക്ക് വലിയ തോതിൽ കേടുപാടുകൾ സംഭവിക്കുകയും പ്രദേശത്ത് വൈദ്യുതി ബന്ധം നിലയ്ക്കുകയും ചെയ്തു.
വിവരമറിഞ്ഞ് മാനന്തവാടി അഗ്നിരക്ഷാ സേന ഉടൻ തന്നെ സ്ഥലത്തെത്തി. നാട്ടുകാരുടെ സജീവമായ സഹകരണത്തോടെ മരം മുറിച്ചുമാറ്റിയതായി വയനാട് ഡെയ്ലി റിപ്പോർട്ട് ചെയ്യുന്നു. ഏകദേശം ഒരു മണിക്കൂറോളം നീണ്ട പരിശ്രമത്തിനൊടുവിലാണ് മരം പാതയിൽ നിന്നും നീക്കം ചെയ്ത് ഗതാഗതം പുനഃസ്ഥാപിച്ചത്.
ഗ്രേഡ് സ്റ്റേഷൻ ഓഫീസർ ജോസഫ് ഐ.യുടെ നേതൃത്വത്തിലുള്ള സംഘമാണ് രക്ഷാപ്രവർത്തനം നടത്തിയത്. ഫയർ ആൻഡ് റെസ്ക്യൂ ഓഫീസർമാരായ അമൃതേഷ് വി.ഡി., ആനന്ദ് എ., രഘു ടി., ഹോം ഗാർഡ് ജോളി ജെയിംസ് എന്നിവർ മരം മുറിച്ചുനീക്കുന്ന ദൗത്യത്തിൽ പങ്കാളികളായി. കെ.എസ്.ഇ.ബി ഉദ്യോഗസ്ഥരെത്തി ലൈനുകൾ പുനഃസ്ഥാപിക്കാനുള്ള നടപടികൾ ആരംഭിച്ചിട്ടുണ്ട്.