ലഹരി വിരുദ്ധ ബോധവൽക്കരണ സന്ദേശം
കൽപറ്റ:നഗരത്തിന്റെ തിരക്കുകളിൽ നിന്ന് മാറി മാനസിക ഉല്ലാസത്തിനും ശാരീരിക വ്യായാമത്തിനുമായി നിരവധി ആളുകൾ എത്തുന്ന കലക്ടറേറ്റ് ഗാർഡനിൽ കുട്ടികൾക്കായി ലഹരി വിരുദ്ധ ബോധവൽക്കരണ സന്ദേശം നൽകി. ലഹരിയില്ലാത്ത നവകേരളത്തിന്നായ്,
ലഹരി വിപത്തിനെതിരെ വിദ്യാർഥികൾ ജാഗ്രത പാലിക്കണമെന്നും ആരോഗ്യകരമായ ജീവിതശൈലി വളർത്തിയെടുക്കണമെന്നും ലഹരി വിരുദ്ധ സന്ദേശം നൽകി എക്സൈസ് വിമുക്തി മിഷൻ വയനാട് ജില്ലാ കോർഡിനേറ്റർ എൻ.സി.സജിത്ത്കുമാർ അച്ചൂരാനം ഓർമിപ്പിച്ചു. ചടങ്ങിൽ എൻ.എസ്.പ്രമോദ്, അനീഷ് , ദേവിദാസൻ എന്നിവർ സംസാരിച്ചു. വിദ്യാർഥികളായ കെ.സി.ആദിദേവ്, സി.പി.ആകാശ്,അദീബ ജാസ്മിൻ എന്നിവരും ചർച്ചയിൽ പങ്കുചേർന്നു.
ജീവിതശൈലി രോഗങ്ങളെ പ്രതിരോധിക്കുന്നതിനായി വ്യായാമം ജീവിതചര്യയുടെ ഭാഗമാക്കാൻ കലക്ടറേറ്റ് ഗാർഡനിലെ ഓപ്പൺ ജിം ഏറെ സഹായകരമാകുന്നുണ്ട്. വൈകുന്നേരങ്ങളിൽ നിരവധി പേരാണ് വ്യായാമത്തിനായും മാനസിക ഉല്ലാസത്തിനായും ഇവിടെ എത്തുന്നത്.
”തിരക്കുപിടിച്ച ജോലികൾക്കും ജീവിത സാഹചര്യങ്ങൾക്കുമിടയിൽ പൊതുജനങ്ങൾക്ക് സൗജന്യമായി പ്രവേശിക്കാവുന്ന സിവിൽ സ്റ്റേഷൻ ഉദ്യാനം ഒരു വലിയ അനുഗ്രഹമായി മാറുകയാണ്.”
നഗരമധ്യത്തിൽ പ്രകൃതിയോട് ഇണങ്ങി വ്യായാമം ചെയ്യാനും വിനോദങ്ങളിൽ ഏർപ്പെടാനും കഴിയുന്നത് പ്രദേശവാസികൾക്കും വിദ്യാർഥികൾക്കും ഒരുപോലെ ഗുണകരമാകുന്നു.