തിരുവനന്തപുരം: നിയമസഭ തെരഞ്ഞെടുപ്പില് കനത്ത പരാജയമേറ്റു വാങ്ങിയെങ്കിലും എല്ഡിഎഫിന് തിരിച്ചുവരാന് സിപിഎം നേതാവ് പിണറായി വിജയന് തന്നെ പ്രതിപക്ഷ നേതാവാകണമെന്ന് പാര്ട്ടിയില് ഭൂരിപക്ഷ അഭിപ്രായം. ശക്തമായ ഭരണപക്ഷത്തെ നേരിടാന് പിണറായി വിജയന് തന്നെ പ്രതിപക്ഷ നേതാവാകണമെന്നാണ് സിപിഎമ്മിലെ ഭൂരിപക്ഷം നേതാക്കളും അഭിപ്രായപ്പെട്ടതെന്നാണ് റിപ്പോര്ട്ടുകള് വ്യക്തമാക്കുന്നത്.
തോല്വിയുടെ പേരില് നേതൃത്വം ഒഴിയേണ്ടതില്ലെന്നും തിരിച്ചുവരവിന് പിണറായി അനിവാര്യമാണെന്നുമാണ് നേതാക്കള് പറയുന്നത്. ഇത്തരത്തില് പാര്ട്ടിയില് ചര്ച്ചകള് സജീവമാണെന്നാണ് റിപ്പോര്ട്ടുകള് വ്യക്തമാക്കുന്നത്. കഴിഞ്ഞ മൂന്ന് പതിറ്റാണ്ട് കാലം പാര്ട്ടിയെ നയിച്ചത് പിണറായി വിജയന് ആണ്. ഇതില് പത്തു വര്ഷം മുഖ്യമന്ത്രിയായാണ് പാര്ട്ടിയെ നയിച്ചത്. ഇപ്പോള് ഒരു തോല്വിയുടെ പേരില് പിണറായി വിജയന് മാറി നില്ക്കേണ്ടതില്ലെന്നാണ് നേതാക്കള് പറയുന്നത്. അത്തരത്തില് മാറിനിന്നാല് തോല്വിയുടെ മുഴുവന് ഉത്തരവാദിത്തവും പിണറായിയുടെ മേല് വരും.
കമ്മ്യൂണിസ്റ്റ് പാര്ട്ടിയെ സംബന്ധിച്ച് ജയപരാജയങ്ങളെ സ്വാഭാവികമായി കാണുന്ന രീതിയാണ് ഉള്ളതെന്നും നേതാക്കള് പറയുന്നു. നിലവില് ഭരണപക്ഷം ശക്തമാണ്. ഒട്ടുമിക്ക യുഡിഎഫ് നേതാക്കളും സഭയിലെത്തിയിട്ടുണ്ട്. ഇവരെ നേരിടാന് ശക്തമായ പ്രതിപക്ഷ നേതാവ് ആവശ്യമാണ്. കെ എന് ബാലഗോപാല് പ്രതിപക്ഷ നേതാവാകാന് അര്ഹനാണ്. എന്നാല് ശക്തമായ ഭരണപക്ഷത്തെ നേരിടാന് പിണറായി വിജയനെ പോലെ കരുത്തുള്ള നേതാവ് തന്നെ വേണമെന്നാണ് നേതാക്കള് ആവശ്യപ്പെടുന്നതെന്നും റിപ്പോര്ട്ടുകള് ചൂണ്ടിക്കാണിക്കുന്നു.