ഡൽഹി മെട്രോ കോച്ചിനുള്ളിൽ വെച്ച് തൻ്റെ ചിത്രം പകർത്തിയെന്ന യുവതിയുടെ ആരോപണത്തിൽ CISF ജവാനെ സസ്പെന്ഡ് ചെയ്തു. എയിംസ് (AIIMS) മെട്രോ സ്റ്റേഷനിൽ നടന്ന ഈ സംഭവം പിന്നീട് ഉന്തും തള്ളുമായി മാറുകയും, തർക്കത്തിന്റെ വീഡിയോ സമൂഹമാധ്യമങ്ങളിൽ വൈറലാവുകയും ചെയ്തു.
മെട്രോ കോച്ചിനുള്ളിൽ വെച്ച് തൻ്റെ ചിത്രം പകർത്തിയെന്ന് ഒരു യുവതി ആരോപിച്ചതിനെത്തുടർന്ന് യാത്രക്കാർ CISF ജവാനെ ചോദ്യം ചെയ്തതോടെയാണ് ഇന്ന് പുലർച്ചെ 12.40-ഓടെ ഈ സംഭവം ഉണ്ടായതെന്ന് മെട്രോ പൊലീസ് വൃത്തങ്ങൾ അറിയിച്ചു.
എന്നാൽ സിഐഎസ്എഫ് ജവാൻ താൻ മൊബൈൽ ഫോണിൽ യുവതിയുടെ ഫോട്ടോ എടുത്തെന്ന ആരോപണം പൂർണമായി നിഷേധിച്ചു.എന്നാൽ, അദ്ദേഹത്തിന്റെ ഫോണിലെ ഗാലറിയിൽ യുവതിയുടെ ചിത്രങ്ങൾ കണ്ടെത്തിയെന്നാരോപിക്കപ്പെട്ടതോടെ, മറ്റ് പല യാത്രക്കാരും ഈ തർക്കത്തിൽ പങ്കുചേർന്നു.
യാത്രക്കാർ ഫോട്ടോകൾ നീക്കം ചെയ്യണമെന്ന് ആവശ്യപ്പെട്ടു, സംഭവത്തിന്റെ ഒരു വീഡിയോയിൽ യാത്രക്കാർ സിഐഎസ്എഫ് ജവാനോട് ചിത്രങ്ങൾ നീക്കം ചെയ്യാൻ ആവർത്തിച്ച് ആവശ്യപ്പെടുന്നത് കാണാം.
തർക്കം രൂക്ഷമായപ്പോൾ, സിഐഎസ്എഫ് ജവാൻ കോച്ചിൽ നിന്ന് ഇറങ്ങാൻ ശ്രമിച്ചതായി ആരോപിക്കപ്പെടുന്നു. യാത്രക്കാർ അദ്ദേഹത്തെ തടഞ്ഞു, ഇത് മെട്രോയ്ക്കുള്ളിൽ ഒരു സംഘർഷത്തിന് കാരണമാകുകയായിരുന്നു. ഏറ്റുമുട്ടലിനിടെ, സിഐഎസ്എഫ് ജവാൻ തന്റെ സർവീസ് പിസ്റ്റൾ പുറത്തെടുത്ത് പ്ലാറ്റ്ഫോമിലേക്ക് കാലെടുത്തുവയ്ക്കുന്നതിന് മുമ്പ് യാത്രക്കാർക്ക് നേരെ ചൂണ്ടിയതായി നിരവധി യാത്രക്കാർ അവകാശപ്പെട്ടു.