ബംഗളൂരു: സ്വര്ണ്ണക്കടത്ത് കേസില് കന്നട ചലച്ചിത്ര നടി രന്യ റാവുവിന് 102 കോടി രൂപ പിഴ. കേസില് നടിക്ക് ഡയറക്ടറേറ്റ് ഓഫ് റവന്യൂ ഇന്റലിജന്സ് 102 കോടി രൂപ പിഴ ചുമത്തിയതായി ഡിആര്ഐ വൃത്തങ്ങള് അറിയിച്ചു. അവര്ക്കൊപ്പം മറ്റ് മൂന്ന് പേര്ക്കും 50 കോടിയിലധികം രൂപ പിഴ ചുമത്തി.
ബംഗളൂരു സെന്ട്രല് ജയിലിലുള്ള നടിക്കും മറ്റുള്ളവര്ക്കും 2,500 പേജുള്ള പിഴ നോട്ടീസ് ഡിആര്ഐ ഉദ്യോഗസ്ഥര് ചൊവ്വാഴ്ച നല്കി. 14.2 കിലോഗ്രാം സ്വര്ണം കടത്താന് ശ്രമിക്കുന്നതിനിടെ മാര്ച്ച് നാലാം തീയതിയാണ് രന്യ ബംഗളൂരു കെമ്പഗൗഡ വിമാനത്താവളത്തില്വെച്ച് അറസ്റ്റിലായത്. ദുബായില് നിന്ന് മടങ്ങിയെത്തുന്ന സമയത്താണ് നടി പിടിയിലായത്. സ്വര്ണാഭരണങ്ങള് അണിഞ്ഞും ശരീരത്തില് ഒളിപ്പിച്ചും നടി സ്വര്ണം കടത്താന് ശ്രമിച്ചു എന്നതാണ് കേസ്.