കൽപറ്റ:ജില്ലയിലെ വിദ്യാഭ്യാസ-ആരോഗ്യ മേഖലകളിലെ വികസന പ്രവര്ത്തനങ്ങള്ക്കായി സ്റ്റേറ്റ് ബാങ്ക് ഓഫ് ഇന്ത്യയുടെ മൂന്നാം മേഖല സി.എസ്.ആര് ഫണ്ടിലുള്പ്പെടുത്തി 47.73 ലക്ഷം രൂപ ജില്ലയ്ക്ക് അനുവദിച്ചു. ജില്ലാ കലക്ടറുടെ ചേമ്പറില് നടന്ന പരിപാടിയില് ജില്ലാ കലക്ടര് ഡി.ആര് മേഘശ്രീയ്ക്ക് എസ്.ബി.ഐ കോഴിക്കോട് മേഖലാ മാനേജര് എ. കെ. റിതേഷ് ചെക്ക് കൈമാറി. വിദ്യാഭ്യാസം, ആരോഗ്യം മെച്ചപ്പെടുത്തുകയെന്ന ലക്ഷ്യത്തോടെയാണ് വിവിധ പദ്ധതികള് നടപ്പാക്കാന് തുക അനുവദിച്ചത്. സ്കൂളുകളില് റീ-യൂസബിള് സാനിറ്ററി പാഡ് വിതരണം, പ്രീ-മെട്രിക് ഹോസ്റ്റലുകളില് സാനിറ്ററി പാഡ് ലഭ്യത ഉറപ്പാക്കല്, വിദ്യാര്ഥിനികള്ക്ക് സൈക്കിള് വിതരണം, അടിസ്ഥാന സൗകര്യ വികസനം എന്നിവ തുക വിനിയോഗിച്ച് നടപ്പാക്കും.
പിണങ്ങോട്, തലപ്പുഴ, പൂതാടി ഗവ യു. പി സ്കൂളുകളുടെയും മുള്ളന്കൊല്ലി, പൂതാടി, അമ്പലവയല് പ്രാഥമിക ആരോഗ്യ കേന്ദ്രങ്ങളുടെയും നവീകരണ പ്രവര്ത്തനവും നടപ്പാക്കും. അച്ചൂര്, കോട്ടത്തറ, തോല്പ്പെട്ടി ഗവ. സ്കൂളുകളിലെ ശുചിമുറി നിര്മാണം, വിവിധ ഗവ. ഹൈസ്കൂള്, പ്രീ-മെട്രിക് ഹോസ്റ്റലുകള്, ഗവ മെഡിക്കല് കോളേജ്, ജില്ലാ സ്പോര്ട്സ് അക്കാദമി, ആര്ച്ചറി അക്കാദമി എന്നിവിടങ്ങളില് സാനിറ്ററി പാഡ് ഇന്സിനറേറ്റര് എന്നിവ സ്ഥാപിക്കും. കലക്ടറേറ്റില് നടന്ന പരിപാടിയില് എച്ച്.ആര് മാനേജര് ചിത്ര, എസ്.ബി.എസ്.യു സെക്രട്ടറി വി. ഗിരീശന്, എസ്.ബി.ഐ.ഒ.എ സെക്രട്ടറി മഹേഷ് വിഷ്ണു എന്നിവര് പങ്കെടുത്തു.